Ei lita jakke som vart altfor stor...

Som eg har nemnt tidlegare er eg ikkje flink til å ta meg tid til å strikka prøvelapp. Som regel går det greit, men av og til blir ikkje resultatet som forventa. I vår var det ein voldsom babyboom rundt oss og eg strikka for harde livet. Det går jo fort å strikka slike små plagg og det er gøy!

Oppskrifta på denne jakka fann eg på Garnstudio, ei fin jakke som eg ville prøva å strikke. Nå vart fargane her noko sjokkarta, men eg tenkte at nokon av dei vordrande mødrene nok kunne lika denne. Jakka vaks sakte men sikkert, men var den ikkje veldig stor?

Når ein ikkje har liten baby er det jo heilt umogeleg å hugsa kor små dei eigentleg er.

Då jakka var ferdig såg eg at ho nok ikkje var noko 6 månaders jakke som den skulle vore. Eg målte med ein genser frå Litlegull sitt kleskåp og då vart det klart at den er meir to til tre år. Kan jo ikkje gi noko så stort til ein liten baby...

Nå var det slik at det berre var gutar inne i magane denne gongen så det var ikkje aktuelt å gi vekk denne.

Litlegull likte jakka godt og ville ha den, ho eeelskar alt som er det minste rosa. Eg hekla ein kant nedst på ermet for at dei skulle harmonera betre med resten av jakka, men den vart i minste laget for Litlegull. Derfor ligg jakka no på lur, kanskje får ei anna lita jente jakka. Om eg tør gi den vekk då, den er jo sprelsk i fargane og i rillestrikk....

Den var iallfall kjekk å laga!

Til ein ny liten gut.

Ein god kamerat av sambo har blitt pappa og den litle fekk dette settet i velkomen til verda gåve. Det er alltid litt "nervepirrande" å skulla overrekka ei heimestrikka gåve, tenk om den ikkje fell i smak i det heile. Tenk om dei synst at det dei får er heilt teit og stygt og så vidare og vidare. Spesielt i tvil vert eg når kleda er strikka i rillestrikk.....

I slike tilfeller er det best å gi frå seg gåva på ein slik måte at mottakarane er åleine når dei opnar, då slepp me ubehagelege sener der dei latar som om dei likar det som gøymer seg under papiret.

Men denne gongen trur eg det gjekk fint, den nybakte pappen verka nøgd og om han ikkje var det er han ein god skodespelar!

Oppskrift frå Nøstebarnboka, meiner det er størrelse 6 månader.

Dress til litle A.

Eg har strikka ein heil dress frå Strikk til Nøstebarn til litle A. Den er i størrelse eit år, men dei er litt merkelege i fassongen desse dressane. Lange i bolen, korte bein og enda kortare armar. Har laga ein til Litlegull tidlegare i str 3. Den passar fint, men er lang i bolen. Måtte samanlikna med andre bloggarar sine bileter av denne dressen, kunne det vera rett at armane skulle vera så korte? Såg ut som det var det same hos alle.

Babyar har i grunn veldig korte armar, iallefall i forhold til hovudet. Har du nokon gong prøvd å få ein eitåring til å klappa over hovudet? Det har eg, går ikkje an det, armane er altfor korte! Komisk å sjå på, men pass på, barnet kan bli veldig frustrert...

Denne gongen strikka eg dressen rundt heile vegen og kløpte den opp etterpå. Dette vart utsett vel fem månader, det verkar naturstridig å kløppa i noko ein har strikka. Eg sydde tett sikksakk midt framme og kløpte i veg. Det gjekk fint, ingen rakning. Får håpa det held seg slik også når dressen er teken i bruk.

Nå veit eg at A fekk ein nyyydeleg Marius-dress til dåpen, blir litt stusseleg i forhold denne då.

Her er herr Babyklisje i armkroken.

Herr Babyklisje.

Her er herr Babyklisje som har flytta til Oslo. Den vart varmt teke i mot både av store og små i husstanden. Nokre dagar etter at den var overrekt kom det kjekt MMS bilete av litle A og herr Babyklisje. Det er kjekt når det ein lagar fell i smak og blir brukt.

Ein kjekk liten kar.

Møt litle kjeke herr Rangle. Han er hekla etter oppskrift i boka Brukt på nytt av K. Gregersen. Han er fylt med fiberfyll og i hovudet har han ein slik orange behaldar som er inne i kinderegg. Den fylte eg med grus frå oppkøyrselen så det er kjekk lyd når herr Rangle blir rista på.

Grunnen til at eg laga den var at ei god veninne av meg som nett hadde fått sitt første barn sa at dersom eg kunne hekla så burde eg prøva meg på leiker. Ho kunne rapportera om at slikt vart seld for store summar i hovudstaden.

Då bestemte eg med for å prøva, hadde jo vore kjekt å gi den litle si heilt eiga leike som ingen har makan til. Men som vanleg vart eg i tvil når den var ferdig. Var den heitl teit eller var den litt søt. Dette måtte testast ut. Dermed vart herr Rangle overrekt til ein liten gut på fire månader og den fall i smak. Bokstavlig talt såg det ut til. Rangle passa supert i ei lita babyhand. Då var det berre å settja i gong med ein ny til guten i Tigerstaden.

Leggvarmarar/pulsvottar.

I fjor vinter strikka eg desse leggvarmarane til Litlegull. Ho gjekk ofte i strikkekjole over ulltrøye og stilongs og overgongen stilongs/sokkar er ikkje så fin. Det vart straks betre med desse.

Dei er frå boka til Lene Holme Samsøe, meiner den heiter Kekt og klassisk for børn.

Kan ikkje finna den i farte. Eg trudde at eg hadde orden i strikkesakene for tida, men det var altså ikkje så vel..

Dei kan også brukast som pulsvarmarar om mammo får låna dei. Dei er veldig lette å strikka og mønsterert er fint.

Vest.

Eg fall for denne vesten med ein gong eg såg den. Oppskrift frå Sandnes hefte 0808, her er det mykje fint frå Lene H Samsøe, berre synd at størrelsane ikkje går høgare enn til fire år. Min fireåring er av den store typen.

Denne strikka eg berre litt lenger så passa den fint. Trur eg at eg strikkar litt laust, men eg kan ikkje veta for eg likar ikkje å hiva vekk tida på prøvelappar. (Det hadde nok vore lurt for av og til kjem det plagg av pinnane som er veldig mykje større enn forventa, men det kan jo vera oppskrifta??? Eh...)

Eg likar godt mønsteret godt, det var kjekt å strikka. Men heller ikkje denne fall i smak. Storegull har brukt den eit par gonger til barnehagen etter iherdig tigging frå strikkaren, tippar den var av før eg var ute av porten...

Ein liten bolero.

Tidlegare i sommar var eg ein tur til Bergen. På transportetappane måtte eg jo ha noko å gjera på.

Tanken var at det kunne vera bra for Vetlegull å ha ei slik jakke over sommarkjolen sidan det har vore ein kald sommar. Men jenta har nekta å ta den på! Som forventa eigentleg...

Kanskje dette kan bli ein pressang?

Oppskrift frå Garnstudio, må sjå til å lera meg å linka.

Fleire bukser.

I år har eg vore i forkant og strikka to ullbukser til kvar av ungane i mai. Som regel ventar eg til der er litt for seint og så må eg kjøpa ullklede. Ikkje noko gale i det, me har MYKJE gode kjøpte ullplagg, men det er jo kjekt å kunna strikka til dei nå medan dei fortsatt er så små at dei vil bruka kleda eg lagar.

Buksene er Ribbestrikka bukser frå "Strikk til Nøstebarn". Gode bukser som er fine og ha under vinterdress eller regnklede. Ei til kvar, Litlegull si er raud øvst slik at rett bukse skal komma på rett unge.

Det har blitt mykje koksgrått i vår. Eg hadde planar om å strikka ein kjole til meg sjølv, og når ein har ein plan så må garn kjøpast inn. Men eg kjem stadig tilbake til at strikkaplagg er lite flaterand på meg. Ein gong når eg har byrja å jogge og kroppen blir flott, då skal eg strikka meg ein kjole...

Det er viktig å halda på håpet, eg ventar på at eg ein dag blir ein joggar og då skal eg bli avhengig slik at eg berre MÅ ut kvar dag. Då blir det stas med strikkakjole! Eg har sete i sofaen å strikka i utallige timar og venta, men eg har ikkje kjent snev av sug etter å komma meg ut på springetur.

Trur eg må endra taktikk!

Monsterbukser.

Eg har lenge sett på monsterbuksene ute på den store webben og i mai fekk eg strikka ei til kvar av dei søte små. Eg fann eit mønster på nett, men synst det var veldig mange masker. Derfor er mine bukser strikka som ei blanding av Monsterbuks oppskrift frå nett (hugsar ikkje kor eg fann den) og Långis frå "Brukt på nytt".

Veldig kjekke bukser og strikka. Eg var litt tvilande til om eg nokon gong kom til å brodera på auger og tenner, men etter drøyt ein månad tok eg fatt og jammen gjekk det greit. Første gong eg har prøvd maskesting, det vart langt frå perfekt, men eg er nøgd. Dei skal jo tross alt for det meste sittast på...

Eg hadde fått med meg tipset om å brodera med dobbel tråd, det er eg glad for elles hadde eg nok mista motet fort. Det er ikkje noko greier nå det ein strevar med ikkje blir fint i det heile.

Litlegull si bukse er overraska!


Storegull ville ha eit sint monster og etter eindel tenking og teikning vart buksa litt sint. Litlegull seier at hennar bukse er skummel, ho har ikkje sett den andre...

Til ein liten ny nevø.

Me er så heldige at me fekk ein ny nevø i mai. Eg hadde strikka eit lite sett til han, men sidan det er sommar nå så kom eg til at eg nok burde strikka eit litt større. Då visste eg ikkje at temperaturen skulle vera så dårleg denne sommaren, hadde nok vore godt med litt ull på ein liten kropp.

Iallfall strikka eg eit nytt sett i hurten og sturten. Det vart omslagsjakke frå "Strikk til nøstebarn" og ribbestrikka babybukse frå "Brukt på nytt".

Omslagsjakka er kjekk og strikka, eg har strikka den to gonger før, til jenter. Var litt i tvil om den ville bli for "jentete", men eg er nøgd med resultatet, synst den vart retteleg "gutete". Soppknappar er frå Stoff og Stil, der hadde dei mange fine knappar til ein fin pris.

Buksa er lang og smal og harmonerer ikkje heilt med jakka, får håpa at det ser betre ut i bruk. Guten er iallfall heilt perfekt, ikkje brei oppe og veldig tynn nede...

Velkommen til verda litle venn, håpar du kjem til å trivst i kleda.

Eg meiner dei er strikka i eit år, og det er bra; me har store flotte ungar i slekta!

"Fotballgenser"

Kva gjer ei strikkeglad (galen?) mamma når fireåringen som ikkje likar ullgenserar ber om å få ein fotballgenser? Jo, då tenker ho fort, korleis ser ein fotballgenser ut? Denne mamma har ikkje peiling på fotball (eller noko anna sport for den saks skuld), men ho har fått med seg at fotballen ofte er kvit og svart. Derfor rasa mor og son innom garnbutikken og plukka med seg litt svart og litt kvitt garn.Her gjeld å smi medan jernet er varmt, kven veit når poden igjen kjem på at han ikkje likar ullgenserar?

Genseren er strikka med utgongspunkt i rullegenser får boka "Strikk til Nøstebarn". Har tilpassa litt med ribbestrikka brot oppe, nede og på armane, synst det ser litt betre ut slik. Tal må vel ein fotballgenser ha , han valte 8.
I ettekant har det komme på eit fotballmerke på ryggen, svigermor skulle vera snill og avnuppe genseren ein kveld ho lånte guten og då fekk ho merka at det var noko i det er seier; Det blir ofte hol av slikt...

Eg prøver meg på blogging.

Etter mange år som blogglesar vil eg prøva meg på min eigen blogg. Eg ser at her er det mykje nytt å læra...

Sidan dette er nok ein strikkeblogg, legg eg ut eit bilete av Feminin rib av Lene Holme Samsøe laga til ein fireårsdag sist sommar.